ໃນວັນທີ 11 ພະຈິກ 2025, ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີ ກະຊວງການຕ່າງປະເທດ, ຮອງປະທານຜູ້ປະຈໍາການ, ຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຕິດຕາມຊຸກຍູ້ ການຈັດຕັ້ງປະຕິບັດວຽກງານພາກສະໜາມ ຂອງ ໂຄງການເກັບກູ້ລະເບີດຊາດ ຢູ່ ເມືອງ ປາກຊ່ອງ, ແຂວງ ຈໍາປາສັກ.
ການລົງຢ້ຽມຢາມຄັ້ງນີ້ ແມ່ນເປັນການຈັດຕັ້ງຜັນຂະຫຍາຍ ແລະ ຕິດຕາມຄວາມຄືບໜ້າໃນການປະຕິບັດເປົ້າໝາຍການພັດທະນາແບບຍືນຍົງ ເປົ້າໝາຍທີ 18 (SDG 18) – ຊີວິດທີ່ປອດໄພຈາກລະເບີດບໍ່ທັນແຕກ ທີ່ ສປປ ລາວ ເປັນພາຄີໃນການປະຕິບັດສົນທິສັນຍາ ວ່າດ້ວຍ ການເກືອດຫ້າມລະເບີດລູກຫວ່ານ.
ແຂວງ ຈໍາປາສັກ ເປັນແຂວງໜຶ່ງທີ່ໄດ້ຮັບຜົນກະທົບຢ່າງໜັກໜ່ວງທີ່ສຸດຈາກລະເບີດບໍ່ທັນແຕກໃນໄລຍະສົງຄາມອິນດູຈີນຄັ້ງທີ 2, ເຊິ່ງບັນຫາລະເບີດບໍ່ທັນແຕກ ຍັງສືບຕໍ່ເປັນໄພຂົ່ມຂູ່ໃຫ້ແກ່ການດໍາລົງຊີວິດຂອງປະຊາຊົນລາວບັນດາເຜົ່າ ແລະ ການພັດທະນາເສດຖະກິດ-ສັງຄົມຂອງທ້ອງຖິ່ນ, ປະຈຸບັນ ໂຄງການເກັບກູ້ລະເບີດແຫ່ງຊາດ ໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນ ໂດຍຜ່ານ ອົງການຈິກສ໌ ເພື່ອດໍາເນີນກິດຈະກໍາໂຄສະນາສຶກສາຄວາມສ່ຽງ, ການສໍາຫຼວດ ແລະ ເກັບກູ້ລະເບີດ ຢູ່ 3 ແຂວງ ພາກໃຕ້ ຄື: ສາລະວັນ, ຈໍາປາສັກ ແລະ ເຊກອງ.
